【決戰區選】多人落機拖篋飛的趕投票:真係幾貴但很值得

0
64

今屆區議會被視為香港人多月來抗爭的「機會」之一,不少選民趕及在選舉結束前在到票站前投票,亦有巿民帶行李趕回港投票,笑言「呢一票真係幾貴」。

傍晚6時許,太古城票站有巿民帶行李到場投票。自18歲已一直有盡選民責任投票的梁小姐,於傍晚落機後隨即「飛的」趕回太古城票站投票。她未又透露投票意向,但稱今次投票格外重要,故即使計劃去旅行,仍刻意遷就行程,以趕及在今早登機、傍晚回港,並乘的士回票站投票,難得同行朋友亦有此念頭,笑言「呢一票真係幾貴」。

不過她認為很值得,亦慶幸能趕及投票,「最初都擔心票站會提早閂門」。她認為,投票是向政府表達投訴的方式,故要好好珍惜,畢竟「可以投票嘅機會不多」。她又稱,對於早前區內有候選人遇襲感到痛心。

從印尼峇里回來的80後、銀行業的葉先生便趕在九龍城區黃埔東票站關前20分鐘投票。他表示,朋友早前在峇里結婚,「一落機就落嚟,機場好多人,差啲call唔到車」。他表示,原先擔心趕不切,幸好因所乘的航班早了20分鐘,最終成功趕到。他又指,區選投票率高反映政府得不到民意支持,並指投票有其作用,「好似買六合彩咁,你連買六合彩動作都唔肯做,呢世都唔會中,正如唔投咗票未必選到,但起碼盡咗自己努力。」

東區城市花園選區選民、剛從台灣回來的何小姐趕及在選舉結束前到達票站投票。她指,城市花園選區過去缺乏競爭,坦言3人政綱「都係麻麻」,但難得有新人參選,希望帶出新氣象「投畀個新人啦」,暗示投予仇栩欣。何小姐亦希望,大眾能透過選票告訴政府市民依然站在抗爭者一邊。

在屯門樂翠選區,最後半小時才趕來票站投票的徐先生表示,自己是剛剛在太古收工,再坐的士趕來票站。他說,年輕世代是也很不幸的一代,所以他認為自己要盡公民責任投票,即使當下不知投票是否有用,「年輕人好徬徨,佢哋用盡所有方法都控訴唔到呢個社會, 所以我哋當下要用唔同嘅方法,唔同嘅渠道去發聲。」他續指,今次投票的最主要考慮點是希望社會交由年輕人的角度出發,因為他們才是未來主人翁,「其實佢哋做咁多嘢為咩啫?都係想有一個公平的民主,而投票絕對係實現民主嘅好重要的一環,所以就要投票。」

觀塘廣德選區、從事教育的劉小姐在關站前15分鐘才到站投票。她指今早人太多,故先處理家事,未料一拖便接近關站時間,「都有啲擔心趕唔切」,急急趕來投票。沒有透露政治立場的她形容,今次區選別具意義,「咁高投票率其實都反映咗市民諗緊咩。」她指希望當選的區議員不只做政治,而是為正義而行。

LEAVE A REPLY

Please enter your comment!
Please enter your name here